السلام عليكم 
ياريت عرفت بوجود الكتب الصوتية من زمان!
من صغري وأنا عندي علاقة خاصة مع الكتب. كانت تبهرني فكرة الغوص في عوالم مختلفة، لكن دائماً عندي مشكلة وحدة: ما قدرت نبني عادة القراءة المنتظمة. نخش بحماس على كتاب جديد ونكمله مرات، لكن بعدها نقعد شهور بلا قراية. إحباط فوق إحباط!
هالشي خلاني نسأل نفسي: شن السبب؟ وهل في طريقة نحبب روحي في الكتب من جديد؟
بعد سنوات من المحاولات الفاشلة،
جتني فكرة: لو القراية ما نجحت، شن حيصير لو استمعت؟ 
وقتها قلت: نجرب وخلاص!
وكانت بداية تغيير جذري لعلاقتي مع الكتب.
تطبيق Moon Reader كان أول خطوة في الرحلة. رغم صوت الرجل الآلي، حسيت إن التجربة مريحة. كانت تخليني نستغل وقت قبل النوم أو أثناء التنقل.
لو كل يوم نسمع ربع ساعة بس، نقدر نختم عشرات الكتب من قائمتي في السنة.
لكن خلونا نكونو صريحين: أصوات الروبوت بدأت تضايقني. حسيت إن التجربة ناقصة. وبعد شوية بحث، لقيت الحل الذهبي: تطبيق Reader أو القارئ من ElevenLabs.
هذا التطبيق مش مجرد قارئ صوتي عادي. باستخدام الذكاء الاصطناعي، يخلق تجربة صوتية تحس وكأنك جالس مع راوي محترف. الأروع، إنك تقدر تختار بين أصوات ولهجات مختلفة، وحتى تحويل الكتاب إلى بودكاست!
سواء كنت تسمع في السيارة، أو أثناء المشي، تطبيق القارئ يعيد احياء علاقتك بالكتب من جديد. جربوه وشاركوا معاي:
شنو أول كتاب حتسمعوه؟ وإذا عندكم تطبيقات أخرى أو نصائح، ما تبخلوش علينا. خلونا نبنوا مع بعض مجتمع محب للقراءة. 
روابط التطبيق اندرويد – الايفون
كتاب قرأته:
التفاوض مش من نقاط قوتي، وهذا السبب اللي خلاني نقرا “Never Split the Difference” ونحاول نطبق اللي تعلمته. الكاتب اسمه كريس فوس، وهو كان مفاوض رهائن في مكتب التحقيقات الفيدرالي (FBI). بخبرته الطويلة في أصعب المواقف التفاوضية في العالم.
الكتاب لكن مش مجرد دليل للتفاوض، بل درس في الحياة كلها. كل يوم نلقوا روحنا في مواقف تحتاج تفاوض: سواء مع الزملاء في العمل، في العلاقات الشخصية، أو حتى في التفاصيل البسيطة زي التفاهم مع حد في السوق.
من أهم التقنيات اللي تعلمتها:
“المرآة“: ببساطة، تكرر آخر كلمتين أو ثلاث قالها الطرف الثاني. الطريقة هذه تعطي إحساس إنك مهتم وتفهم اللي يقول فيه، وتخليهم يفتحوا أكثر في الكلام.
“نبرة الصوت الهادئة“: استخدام نبرة صوت مطمئنة وثابتة يخفف التوتر ويخلق أجواء إيجابية للنقاش!
“السؤال المفتوح“: بدل ما تقول “ليش تأخرت؟”، جرب تقول “شن اللي خلاك تتأخر؟”. الأسئلة المفتوحة تخلي الطرف الثاني يشرح ويعطيك معلومات أكثر.
الكتاب يركز على كيف تحصل على اللي تبيه من غير ما تحس الطرف الثاني بالضغط أو الهزيمة. ننصحكم تقروا الكتاب أو حتى تسمعوه، خاصة لو كنتوا مهتمين بتطوير مهارات التفاوض في حياتكم اليومية.
ولو جربتوا هالتقنيات، قولوا لي: شنو كانت النتيجة؟
فيديو شاهدته:
سنة 2024 كانت مليانة بالأحداث، بين المأساوية والمفرحة. مفش أحسن من أنك تلخص كل السنة وتشوف أبرز لحظاتها في فيديو مدته ساعة ونص. الفيديو هضا من صناع المحتوى المفضلين عندي باسم، Ordinary Things.
بعد ما كملت الفيديو، حسيت إن السنة كلها مرت كيوم واحد بس! الفيديو شدني لأنه يعطيك نظرة عميقة على أبرز أحداث السنة بشكل مرح وذكي. لو تبي ترجع وتشوف أمس كيف كان وتخطط لبكرة، ننصحك تدير طاسة شاي ساخنة تخش تحت البطانية، وتستمتع بالفيديو.
لو مهتم، الرابط في الاسفل ولو عجبك، شاركني رأيك!
The Diabolical Business of 2024
مقتطفات اخرى:
“الجلوس المفرط خطر حتى لو تتمرن“: لو قعدت أكثر من 10 ساعات يوميًا، خطر أمراض القلب يزيد 40%، والموت 54%! الرياضة وحدها ما تكفي.
“حبوب النوم والزهايمر“: دراسة تقول إن حبوب النوم الشائعة تقلل من تراكم بروتينات الزهايمر، أمل جديد للوقاية.
“مايكروبلاستيك وتأثيره علينا“: البلاستيك الدقيق يسبب مشاكل في الخصوبة، الأمعاء، والرئة. إنتاجه لازم ينظم وبسرعة!
تم اعدادها بـ♥ من المانيا
لك جزيل الشكر على وقتك وقرائتك النشرة وأتمنى لك و لكِ العفو والعافية
في امان الله
